Eronda Trampning o‘g‘lini o‘ldirganlik uchun 10 mln dollar mukofot va’da qilindi
Eron televideniyesi Barron Trampning ehtimoliy manzillari va universitetga borish yo‘nalishi ko‘rsatilgan lavhani e’lon qildi.
Eron davlat telekanali AQSh prezidenti Donald Trampning 20 yoshli o‘g‘li Barron Tramp haqida uch daqiqalik lavhani efirga uzatdi. Unda Barronni o‘ldirganlik uchun 10 million dollar mukofot va’da qilindi. Bu haqda Bild xabar berdi.
“Channel 3” telekanalida namoyish etilgan videoda Barron Tramp bo‘lishi mumkinligi aytilgan joylar, jumladan, uning taxminiy manzillari ko‘rsatilgan. Shuningdek, uning Vashingtondagi universitetga borish yo‘nalishi ham qayta tasvirlangan.
Lavhada AQSh Maxfiy xizmati agentlari Barronni tun-u kun qo‘riqlayotgani va ayrim agentlar uning universitetida talaba sifatida niqoblanib yurgani ta’kidlangan.
Biroq videodagi tasvirlarning katta qismi sun’iy intellekt yordamida yaratilgan sahnalashtirilgan materiallardan iborat. Lavhada Barron Trampga suiqasd uyushtirishga tayyorgarlik ko‘rilayotgani haqidagi da’volarni tasdiqlovchi ishonchli dalillar keltirilmagan.
Mazkur lavha haqida xabar bergan Isroil OAVlari ham undagi bayonotlar Barron Trampga nisbatan real tahdid mavjudligini tasdiqlamasligini qayd etgan.
Eron davlat OAVlari avval ham Tramp oilasi a’zolariga tahdidlar bilan bog‘liq materiallarni namoyish etgan. Xususan, ilgari shunga o‘xshash lavha AQShning birinchi xonimi Melaniya Trampga bag‘ishlangan bo‘lib, unda u odatda tashrif buyuradigan joylar haqida ma’lumot berilgan.
