Toshkentda YPX talabiga bo‘ysunmagan raqamsiz Malibu-2 haydovchisi ushlandi
YPX xodimlari haydovchiga to‘xtash ishorasini bergan, biroq u avtomobilni keskin ortga burib, qochishga uringan.
Toshkent halqa avtomobil yo‘lida YPX xodimlarining to‘xtash ishorasiga bo‘ysunmay, harakatni davom ettirgan davlat raqam belgisisiz Malibu-2 haydovchisi ushlandi. Bu haqda Toshkent shahar IIBB axborot xizmati ma’lum qildi.
Ma’lum qilinishicha, avtomobil Uchqahramon tomondan Hasanboy hududi tomon harakatlanayotgan vaqtda YPX xodimlari e’tiborini tortgan. Avtomobilning davlat raqam belgisi bo‘lmagan, old yon oynalari noqonuniy qoraytirilgani hamda orqa qismiga qo‘shimcha antenna o‘rnatilgani aniqlangan.
YPX xodimlari haydovchiga to‘xtash ishorasini bergan. Biroq u qonuniy talabga bo‘ysunmasdan, avtomobilni keskin ortga burib, qochishga uringan.
Ko‘rilgan choralar natijasida haydovchi va transport vositasi ushlangan. Haydovchiga nisbatan ma’muriy bayonnoma rasmiylashtirilib, Malibu-2 vaqtincha saqlash uchun jarima maydonchasiga joylashtirilgan.
Holat bilan bog‘liq video ijtimoiy tarmoqlarda tarqalganidan so‘ng, o‘zini haydovchining otasi deb tanishtirgan shaxs videoni e’lon qilgan foydalanuvchilardan biriga murojaat qilgan. Tarqalgan audioyozuvda erkak “ishni pul bilan ham hal qila olmayotganini”, o‘g‘lini haydovchilik guvohnomasidan mahrum qilishmoqchiligini aytib, videoni o‘chirishni so‘ragan. Foydalanuvchi talabni rad etganidan so‘ng esa erkak unga nisbatan haqoratli so‘zlar ishlatib, manziliga borish bilan tahdid qilgan.
Holat yuzasidan tegishli tartibda chora ko‘rilgani ma’lum qilindi.
