Yogurt idishiga yashirilgan 267 gramm giyohvandlik moddasi aniqlandi
Toshkentda giyohvandlik vositalarining noqonuniy aylanmasiga chek qo‘yildi.
Toshkentda ikki holatda giyohvandlik vositalari musodara qilindi. Bojxona qo‘mitasi xodimlari huquqni muhofaza qiluvchi boshqa organlar bilan hamkorlikda giyohvandlik vositalarining noqonuniy aylanmasiga qarshi tezkor tadbirlar o‘tkazdi.
Tezkor tadbirlarning birida oldindan olingan ma’lumotlar asosida gumon ostiga olingan fuqaro Farg‘ona–Toshkent yo‘nalishida harakatlanayotgan avtomashinada yo‘lovchi sifatida Toshkent shahriga kelayotgani aniqlangan.
Avtomashina poytaxt hududiga kirganidan so‘ng to‘xtatilib, xolislar ishtirokida ko‘zdan kechirilgan. Tekshiruv davomida fuqaroning yonidan ikki dona yogurt idishiga polietilen paketga o‘ralgan holda yashirilgan, umumiy og‘irligi 267 gramm bo‘lgan giyohvandlik moddasi aniqlangan. Mazkur modda belgilangan tartibda ashyoviy dalil sifatida olib qo‘yilgan.
Yana bir tezkor tadbir Toshkent shahar bojxona boshqarmasining Kontrabandaga qarshi kurashish bo‘limi xodimlari tomonidan huquqni muhofaza qiluvchi boshqa idoralar bilan hamkorlikda o‘tkazilgan.
Unda oldindan olingan tezkor ma’lumotlar asosida gumon ostiga olingan fuqaroning yashash xonadoni xolislar ishtirokida ko‘zdan kechirilgan. Natijada xonadondan 14 gramm gashish, bir dona elektron tarozi hamda giyohvandlik vositalarini iste’mol qilish uchun mo‘ljallangan maxsus moslamalar aniqlanib, ashyoviy dalil sifatida olib qo‘yilgan.
Mazkur holatlar yuzasidan hozirda tergov harakatlari olib borilmoqda. Tergov yakunlariga ko‘ra, holatlarga qonunchilikda belgilangan tartibda huquqiy baho beriladi.
