Misr hamjamiyatni falastinliklarni himoya qilishga chaqirdi
Misr chegarasida Gaʼzo sektori uchun gumanitar yo‘lak ochilgan.
G‘azo sektoriga insonparvarlik yordamlari kela boshladi. Ilgari gumanitar yordamni bombardimon tufayli yetkazib bo‘lmasdi. Bu haqda Misr prezidenti Qohirada o‘tayotgan Falastin muammosi bo‘yicha sammitda aytib o‘tdi.
Sammitda 30 dan ortiq davlat vakillari ishtirok etmoqda. Bular, asosan, davlat rahbarlari va tashqi ishlar vazirlari, shuningdek, bir qancha xalqaro va mintaqaviy tashkilotlardir. Misr prezidenti hamjamiyatni falastinliklarni himoya qilishga chaqirdi. Bahrayn qiroli Falastin huquqlari taʼminlanmay turib, Yaqin Sharqda barqarorlik bo‘lmaydi, degan bo‘lsa, Iordaniya qiroli G‘azo sektoridagi urushni zudlik bilan to‘xtatishga chaqirdi.
Avvalroq G‘azo sektoriga xalqaro gumanitar yordam yuklangan birinchi yuk mashinalari yetib kelgani xabar qilingan edi. 20 ta yuk mashinasi oziq-ovqat, suv va dori-darmon olib kelgan.
Bir kun avval Misr bilan chegarada ushbu avtomobillar o‘tishi uchun nazorat-o‘tkazish punkti ochilgan edi. Og‘ir yuk mashinalari tarkibi Isroil harbiylari tomonidan qurol kontrabandasining oldini olish uchun sinchkovlik bilan tekshirildi, biroq taqiqlangan hech narsa topilmadi. G‘azo sektoriga 50 tonnaga yaqin oziq-ovqat keltirildi.
G‘azo sektori hozirda Isroil tomonidan butunlay to‘sib qo‘yilgan. Elektr o‘chirilgan, suv yo‘q. Mintaqa gumanitar falokat yoqasida. Ayni paytda Misr bilan chegarada oziq-ovqat va barcha zarur narsalar bo‘lgan yana 200 ga yaqin yuk mashinasi to‘xtab turibdi.
