Zurab Pololikashvili UNWTO Bosh kotibi lavozimiga 3 muddatga saylanish huquqini qo‘lga kiritdi

 

Samarqandda bo‘lib o‘tgan BMT Butunjahon turizm tashkiloti Bosh Assambleyasining yubiley 25 sessiyasida Zurab Pololikashviliga faoliyatini davom ettirish uchun qayta saylanish imkoniyati berildi.

 

Maʼlumot uchun, Zurab Pololikashvili 2017 yilda UNWTO Bosh kotibiga aylangan. 2022 yilda Madridda bo‘lib o‘tgan Bosh Assambleyaning 24 sessiyasida esa ikkinchi bor qayta saylandi. Uning amaldagi vakolat muddati 2025 yilda tugaydi. Shu yili Saudiya Arabistoni mezbonlik qiladigan UNWTO Bosh Assambleyasining 26-sessiyasida tashkilot bosh kotibligiga navbatdagi saylov o‘tkaziladi.

 

Taʼkidlash joizki, Zurab Pololikashvili boshchiligida UNWTO tomonidan bir qancha ijobiy o‘zgarishlar amalga oshirilmoqda. UNWTO‘ga aʼzo davlatlarda xorijlik turistlar soni keskin oshdi. Xususan, O‘zbekistonga 2022 yilda 5,2 million xorijlik sayyoh kelgan bo‘lsa, 2023 yilda bu raqam 7 millionga yetdi.

 

Alohida qayd etish kerakki, pandemiya davrida ham Z.Pololikashvili turizm sohasi rivojiga qaratilgan turli tadbirlarni amalga oshirdi. Buning samarasi o‘laroq turizm sohasi barqarorligini nisbatan saqlab qoldi va pandemiyadan keyin jadal suratlarda rivojlanmoqda.

 

Qolaversa, tashkilotga aʼzo davlatlar soni ortib bormoqda. So‘nggi ikki yil ichida moliyaviy menejmentda misli ko‘rilmagan muvaffaqiyatga erishildi: 2023 yilda tashkilot byudjetning muntazam daromadi 14,3 million yevroga yetdi. Zurab Pololikashvili bu mablag‘lar tashkilotga aʼzo davlatlarda turizm sohasi rivoji uchun sarflanishini bir necha bor taʼkidlagan.

 

Bundan tashqari, UNWTO hozirda 58 millat vakillaridan iborat 186 nafar xodimga ega. Tashkilot yosh isteʼdodlarni qo‘llab-quvvatlamoqda, gender tengligiga amal qilmoqda.

 

Z.Pololikashvili UNWTO Bosh kotibi sifatida Argentina, Xitoy, Hindiston, O‘zbekiston kabi davlatlardagi faoliyatini yana-da kuchaytirish niyatida. Tashkilot, shuningdek, taʼlimni kuchaytirish, investitsiyalarni oshirish va izchil islohotlar orqali turizm sohasini yana-da rivojlantirishni ustuvor maqsad sifatida belgilagan.