Toshkentda 43 yoshli erkak mastlikda sherigini o‘ldirib qo‘ydi
Holat joriy yil Qurbon hayiti kuni yuz bergan.
Toshkentda 43 yoshli erkak tanishini urib o‘ldirib qo‘ydi.
Maʼlumotlarga ko‘ra, voqea 2023 yilning 28 iyun kuni, Qurbon hayiti bayramida sodir bo‘lgan. Asli namanganlik 43 yoshli B.A. shu kuni bayramni nishonlash maqsadida tanishi M.K.ning ish joyiga borgan. U yo‘lda o‘zi bilan olib kelgan spirtli ichimlikni M.K. bilan birga ichib, ovqatlanib bo‘lgach, uxlab qolgan.
B.A.ning so‘zlariga ko‘ra, u uxlab yotgan paytda M.K. temir choynak bilan boshiga urgan. Uyg‘onib, nega bunday qilganini so‘raganda esa so‘kinganligini aytib, uni urmoqchi bo‘lgan. B.A. esa tushida so‘kingan bo‘lishi mumkinligini tushuntirib, o‘zini himoya qilishga uringan. Shundan so‘ng, u M.K.ni bosib olib, bir necha marotaba qattiq urgan va keyin joyiga yotib uxlagan. Tongda turib, sherigini uyg‘otmoqchi bo‘lganida esa uning vafot etganini tushungan.
So‘ngra, xotiniga qo‘ng‘iroq qilib, voqeani so‘zlab bergan. Xotini unga militsiyaga o‘zini topshirishni maslahat bergan.
2023 yilning 4 oktyabr kuni holat yuzasidan bo‘lib o‘tgan sudda ayblanuvchining xotini 2022 yildan buyon eri bilan yashamasligi, bunga ham uning spirtli ichimliklarga ruju qo‘ygani va mast holda ko‘p janjal qilishi sabab bo‘lganini aytgan.
Sud B.A.ni Jinoyat kodeksining 97-moddasi (qasddan odam o‘ldirish) bilan aybli deb topib, 10 yilga ozodlikdan mahrum qilish jazosiga hukm qilgan.
