Samarqanddagi “SRIS-21 yashil bog‘i”da 1000 tup daraxt ko‘chati o‘tqazildi

 

BMTning Cho‘llanishga qarshi kurash to‘g‘risidagi konvensiyasi (SRIS-21) ijrosini ko‘rib chiqish qo‘mitasining 21-sessiyasi doirasida Samarqandda “SRIS-21 yashil bog‘i” barpo qilindi.

 

Tadbirda BMT Bosh kotibi o‘rinbosari, Cho‘llanish va qurg‘oqchilikka qarshi kurash bo‘yicha Konvensiya ijrochi kotibi Ibrohim Tiav, O‘zbekiston Respublikasi Oliy Majlisi Senati raisi Tanzila Norboyeva, Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov hamda xorijiy delegatsiyalar vakillari ishtirok etdi. 

 

Tadbir davomida “SRIS-21 yashil bog‘i”da 1000 tup daraxt ko‘chatlari o‘tqazildi. Maʼlumot uchun, bog‘ hududi 2,5 gektarga teng bo‘lib, aholi uchun xizmat qiladigan jamoatchilik bog‘iga aylantiriladi.

 

O‘zbekiston Respublikasi Prezidenti Shavkat Mirziyoyev tashabbusi bilan boshlangan "Yashil makon" umummilliy loyihasi bugun anʼanaga aylandi. Ekologiya, atrof-muhitni muhofaza qilish va iqlim o‘zgarishi vazirligi, vazirlik huzuridagi O‘rmon xo‘jaligi agentligi tomonidan “Yashil makon” umummilliy loyihasi doirasida yurtimiz bo‘ylab daraxt ko‘chatlari o‘tqazilmoqda.

 

Xususan, ushbu loyiha boshlanganidan beri o‘tgan 2 yilda uy-joy massivlarida 1 ming 200 gektardan ortiq yashil bog‘ va jamoat parklari, 1 million gektardan ziyod yashil hudud va qoplamalar barpo etildi.

 

Joriy yilda esa 25-oktyabrdan 1 dekabrgacha “kuzgi daraxt ekish mavsumi” eʼlon qilindi, uning doirasida 85 million tup ko‘chat ekish rejalashtirilgan.

 

Qolaversa, o‘rmon xo‘jaliklarida 5 million dona daraxt ekish, chiqindi poligonlari atrofida va yirik sanoat korxonalari hududida “yashil belbog‘” yaratish, dala chetlarida 20 million tup terak, tut va uzum ekish, bog‘cha, maktab, oliygoh va shifoxonalar hududida 3,5 millionta ko‘chat ekish, Orolning qurigan tubida 100 ming gektarda “yashil qoplama”larni barpo etish ko‘zda tutilgan.