O‘zbekistonning xalqaro reyting va indekslardagi o‘rnini yaxshilash: muammo, yechim, amaliyot

 

Har bir inson o‘z yurti taraqqiyoti, uning nufuzini xalqaro reytinglarda yuqorilaganini ko‘rishni istaydi. Xususan, rivojlanayotgan Yangi O‘zbekistonning dunyo hamjamiyatidagi nufuzi tobora ortib bormoqda. O‘zbekiston Respublikasi Prezidenti huzuridagi Davlat boshqaruv akademiyasida tashkil etilgan “O‘zbekistonning xalqaro reyting va indekslardagi o‘rnini yaxshilash muammolari: nazariya, amaliyot va strategiya” mavzusida xalqaro ilmiy-amaliy konferensiyada ham ayni masalalar muhokama markazida bo‘ldi.

 

 

Akademiya, Toshkent Singapur menejmentni rivojlantirish instituti,“Sciyence and innovation” xalqaro ilmiy jurnali hamkorligidagi ushbu anjuman soha ekspertlari, olimlar va yosh tadqiqotchilarni bir manzilga jamladi.

 

Xalqaro reyting va indekslar dunyodagi institutsional muhitning sifatini baholashda iqtisodiy rivojlanishning asosiy sharti sifatida jahon hamjamiyati tomonidan qabul qilingan vositadir. Ular nafaqat ekspertlar, balki davlatlar darajasida ham islohotlar va ijtimoiy-iqtisodiy siyosat mezoni sifatida qo‘llanib kelinadi.

 

Keyingi yillarda mamlakatimiz ko‘pgina ustuvor reytinglarda yuqorilab borayotgani yurtimizda aholi turmush farovonligini oshirish, jamiyatimizda ochiqlik, oshkoralikni taʼminlash borasida qilinayotgan ezgu ishlarning muhim natijasidir.

 

 

Xususan, 2022-yilda O‘zbekiston 2021-yilda eʼlon qilingan va o‘zi uchun ustuvor deb bilgan jami 19 ta xalqaro reytingdan 11 tasida o‘z pozitsiyasini yaxshiladi. Jumladan, 2022-yilda Global innovatsiyalar indeksida o‘z o‘rnini 4 pog‘onaga ko‘tarib, 132 ta davlat orasida 82-o‘rinni, Raqobatbardosh sanoat unumdorligi indeksida 5 pog‘onaga ko‘tarib, 154 ta davlat orasida 89-o‘rinni, Elektron hukumatni rivojlantirish reytingida 18 pog‘ona yaxshilab, 193 ta davlat ichida 69-o‘rinni egalladi.

 

Konferensiyaga mavzu yuzasidan yurtimiz siyosatchi va olimlaridan 500 dan ortiq, xorijiy tadqiqotchilardan 50 ga yaqin ilmiy-maqola va tezislar kelib tushdi hamda ularning 200 tasi tanlab olindi. “Sciyence and Innovation” xalqaro ilmiy jurnali bilan hamkorlikda har bir maqolaga raqamli identifikator raqami (DOI) olinib, Polshaning Indeks Copernikuss, Yevropaning Zenodo va Open Aire, Rossiyaning Cyberlinenka, Angliyaning EuroPub xalqaro ilmiy bazalariga joylashtirildi. Google akademiya” xalqaro ilmiy qidiruv tizimida indekslandi.

 

Bu esa, anjuman doirasida nashr etilgan maqola va tezislardan dunyoning turli nuqtalaridagi tadqiqotchilar erkin foydalanishiga imkon yaratadi.