Qo‘qonda 19 yoshli fuqaro davlatga 12 mlrd zarar yetkazdi
U noqonuniy mayning ferma tashkil qilgan.
Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish Departamenti bilan hamkorlikda o‘tkazilgan tezkor tadbirda noqonuniy tarzda kriptovalyuta ishlab chiqarish bilan shug‘ullanib kelgan shaxs qo‘lga olindi.
Qo‘qon shahrida yashovchi, 2004 yilda tug‘ilgan mazkur fuqaro tadbirkor sifatida davlat ro‘yxatidan o‘tmasdan, ushbu shahardagi xonadonlarning birida kriptovalyuta ishlab chiqarish maqsadida elektr taʼminoti korxonasi bilan shartnoma tuzmasdan, umumiy quvvati 104,2 kiloVatt/soat bo‘lgan 31 dona “Vatsmayner M21S” qurilmalari va 2,16 kiloVatt/soat bo‘lgan ventilyator va yoritgichlar, jami quvvati 106,3 kiloVatt/soat bo‘lgan elektr qurilmalarini o‘zboshimchalik bilan elektr tarmog‘iga ulab, 2020 yildan 2023 yilga qadar jami 2 mln 794 ming bir yuz kiloVatt elektr energiyasidan foydalanib, elektr taʼminoti korxonasining 12 mlrd 369 mln so‘mlik mulkini yashirin ravishda talon-taroj qilganligi aniqlangan.
Hozirda holat yuzasidan mazkur shaxsga nisbatan Jinoyat Kodeksining 169-moddasi 4-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
