Bolalarning 60 foizidan ortig‘i o‘z huquqlarini himoya qila olmaydi
Bola huquqlari bo‘yicha o‘tkazilgan U-Report so‘rovi natijalari e'lon qilindi.
Oliy Majlis Senati raisi Tanzila Norboyeva 23 noyabr — Jahon bolalar kuni munosabati bilan bolalar hamda nodavlat notijorat tashkilot vakillari bilan uchrashdi. Unda bola huquqlari bo‘yicha o‘tkazilgan U-Report so‘rovi natijalari e'lon qilindi.
So‘rovnomada 1 ming 800 dan ortiq respondent bola huquqlarini amalga oshirish bo‘yicha o‘z fikrlarini bildirgan.
So‘rov natijalariga muvofiq, respondentlarning to‘rtdan bir qismidan ozrog‘i (22 foiz) bola huquqlari buzilgan taqdirda, ularni qanday himoya qilishni biladi.
Baʼzi bolalar o‘z huquqlari haqida gapirishdan uyaladilar (16 foiz) yoki o‘z huquqlarini himoya qilishga harakat qilsalar, jazolanishdan qo‘rqadilar (13 foiz).
Bolalarning 60 foizidan ortig‘i, agar ularning huquqlari u yoki bu sabablarga ko‘ra buziladigan bo‘lsa, o‘z huquqlarni himoya qila olmasliklarini aytishgan.
Senat majlisining yosh ishtirokchilari bolalarning eng ko‘p buziladigan huquqlari yuzasidan o‘z fikrlarini bildirgan. Unda maktabga bormaslik, iqlim o‘zgarishi va atrof-muhit, bolalarning yo‘llardagi xavfsizligi, oiladagi zo‘ravonlik hamda o‘smirlarning ruhiy salomatligi masalalariga urg‘u berdi.
U-Report so‘rovlari shuni ko‘rsatadiki, qishloq joylarda respondentlarning 70 foizi, shahar va viloyat markazlarida yashovchi respondentlarning 85 foizi internetdan bepul foydalanish imkoniyatiga ega. Senatdagi yig‘ilishda yosh ishtirokchilar internetdagi zararli saytlarga blok qo‘yish hamda internetda bolalar xavfsizligini taʼminlashga jiddiy eʼtibor qaratishni so‘ragan.
Avvalroq voyaga yetmagan shaxslarga nisbatan jinsiy zo‘ravonlik sodir etgan shaxslarning bolalar bilan ishlashi qatʼiyan man etilishi xabar qilingan.
