Poytaxtda “aqlli” bekatlar tashkil etiladi
Shuningdek, ular videokuzatuv tizimi bilan ham jihozlanishi aytilmoqda.
Natijada bekatda mobil qurilmalarini quvvatlantirish, Wi-fi tarmog‘idan foydalanish hamda elektron tabloda kutilayotgan avtobus qatnov vaqtlarini ko‘rish mumkin bo‘ladi.
Toshkent shahar hokimligi Matbuot xizmatining xabariga ko‘ra, Bobur va Furqat ko‘chalarida yo‘llarni joriy ta’mirlash, transport harakatini optimallashtirish, ITTni joriy etish ishlari boshlangan.
Ishlar doirasida sinov tariqasida “aqlli” bekatlar tashkil etilishi ko‘zda tutilgan.
Unga ko‘ra, jamoat transporti yo‘lovchilari va boshqalar o‘z mobil qurilmalarini quvvatlantirishi, Wi-fi tarmog‘idan foydalanishi hamda elektron tabloda kutilayotgan avtobus kelishiga qancha vaqt qolganligini ko‘rishlari mumkin bo‘ladi. Shuningdek, bekat videokuzatuv tizimi bilan ham jihozlanib, yanada kengroq bo‘ladi.
Bundan tashqari, Muqimiy nomidagi teatr oldida avtomobillar uchun pullik to‘xtash joylari va elektr transport vositalarini quvvatlantirish joylari sinov tariqasida tashkil qilinadi.
"Qolaversa, velosiped va samokat foydalanuvchilari ham turargohdan foydalanish imkoniyatiga ega bo‘lishadi, lekin bepul asosda. Bu mazkur manzilda yo‘l bo‘yida to‘xtash joylari bilan bog‘liq vaziyatni yaxshilashi va kikshering foydalanuvchilari uchun qo‘shimcha qulaylik bo‘lishi kutilmoqda",- deyiladi xabarda.
