Toshkentdagi bog‘chada bolaga qo‘pollik qilgan murabbiy ishdan olindi
Avvalroq bu bo‘yicha ota-onalarning ommaga murojaati eʼlon qilingandi.
Ijtimoiy tarmoqda Toshkent shahrining Yunusobod tumanidagi 136-sonli DMTTda raqs to‘garagiga qatnayotgan qizaloqning raqs o‘qituvchisi uning qo‘lini qattiq tortib qichqirgani bo‘yicha ota-onalarning murojaati tarqaldi.
Maktabgacha va maktab ta'limi boshqarmasi tomonidan mazkur holat bo‘yicha navbatdan tashqari yig‘ilish o‘tkazilib, Kasaba uyushmasi aʼzolari ishtirokida muhokama qilingan.
Unda raqs to‘garagi rahbari M.Sh.ga “Maktabgacha taʼlim tashkilotlarining takomillashtirilgan namunaviy odob-axloq qoidalarini tasdiqlash to‘g‘risida”gi 478-sonli buyruq talablarini buzganligi tushuntirib o‘tilgan va xodim bilan tuzilgan mehnat shartnomasi bekor qilingan.
