Rossiyaliklar O'zbekistonda tog'-chang'i kurortini quradi
Uni barpo etish uchun jami 300 million AQSh dollari sarmoya kiritiladi.
Rossiyaning ommabop "Argumenti i fakti" haftanomasida "Rossiyalik investorlar O'zbekistonda tog'-chang'i kurortini quradi" sarlavhali maqola e'lon qilindi.
Maqolada Qashqadaryo viloyati hokimligi matbuot xizmatiga tayanib, Rossiyadan kelgan investorlar O'zbekiston hududida yana bir dam olish maskani yaratish niyatida ekani haqida xabar qilingan.
Gazetada yozilishicha, tadbirkorlar tog'-chang'i kurortini quradilar, shuningdek, uni uchta kanat yo'li va besh yulduzli mehmonxonalar bilan jihozlash rejalashtirilgan.
"Qishki oromgohni barpo etish uchun jami 300 million AQSh dollari sarmoya kiritiladi. Rejaga ko'ra, loyihaning birinchi bosqichini amalga oshirish 2026-yilga mo'ljallangan", - deyiladi xabarlarda.
