Toshkentda chiqindi narxi ham oshdi
Mazkur narxlar bugundan amal qiladi.
Toshkent shahrida chiqindini to‘plash va olib chiqish xizmatlari uchun majburiy to‘lov tariflari miqdorining yangi narxlari tasdiqlandi. Bu bo‘yicha shahar hokimining qarori eʼlon qilindi.
Hujjat bilan Xalq deputatlari Toshkent shahar kengashining 2023 yil 29 noyabrdagi qarori tasdiqlandi.
Unga belgilanishicha, qattiq maishiy chiqindilarni olib chiqish uchun ko‘rsatiladigan xizmatlar — aholi uchun (bir kishi bir oyda) 7500 so‘m QQSsiz (amaldagi narx 4500 so‘m).
Bu miqdor byudjet tashkilotlari uchun QQSsiz 89 977 so‘mni tashkil etadi (amaldagi narxi 53 ming 986 so‘m).
Narxlar qaror eʼlon qilingan kun, yaʼni 2024 yil 4 yanvardan amalga kiritiladi.
