Buxoro qon quyish markazi xodimlariga jinoiy ish ochildi

 

Buxoro viloyati Qon quyish markazi masʼul xodimlari tomonidan donor qonlarning laboratoriya tekshiruv natijalari o‘rganilmay turib, bemorlarga quyilgani aniqlandi.

 

Huquqni muhofaza qiluvchi organlarning ishonch raqamiga kelib tushgan murojaat yuzasidan Buxoro viloyat Qon quyish markazida yuqumli kasalliklarning tarqalishiga shart-sharoit yaratib berayotgan shaxslarni aniqlash bo‘yicha tezkor tadbir olib borilgan. Unga ko‘ra, markazning masʼul shaxslari ko‘rsatmasi asosida donor qonlarga nisbatan o‘tkazilgan laborator tekshiruv natijalari o‘rganilmasdan bemorlarga quyilayotgani maʼlum bo‘lgan.

 

Qonunchilikka ko‘ra, donorlarning qoni laborator tekshiruvdan keyin o‘tkazilishi belgilangan. Unga ko‘ra, Donoroning qonida OIV/OITS, «v» va «S» gepatitlari yoki boshqa gemotransmissiv insfeksiyalar elementlari aniqlanganda qoni yo‘q qilinishi va donorlikdan chetlashtirilishi lozim.

 

Biroq soha mutaxassislaridan tashkil topgan ishchi guruh tomonidan o‘tkazilgan tezkor tadbirda markazda «Qon va uning tarkibiy qismlari donorligi to‘g‘risida»gi Qonun talablari qo‘pol ravishda buzilgani aniqlangan.

 

Masalan, donor N.J.ning qoni o‘tkazilgan laborator tahlil natijalari kutilmasdan bemor B.H.ga quyilgan. Tezkor tadbir davomida esa qon quyish markazida o‘tkazilgan birlamchi laborator tekshiruvda donor N.J.da zahm (sifilis) kasalligi borligi aniqlangan va bu sudga oid biologiya ekspertizasining xulosasi bilan ham tasdiqlangan bo‘lgan.

 

Ayni paytda Buxoro viloyati prokuraturasi tomonidan viloyat Qon quyish markazi xodimlari va boshqa shaxslarga nisbatan O‘zbekiston Respublikasi Jinoyat kodeksining 113-moddasi, 1-qismi (Tanosil yoki OIV kasalligi/OITSni tarqatish) bilan jinoyat ishi qo‘zg‘atilgan. Hozirda viloyat IIB tomonidan tergov harakatlari olib borilmoqda.