Namanganda Rossiya rublini Qirg‘izistonga o‘tkazmoqchi bo‘lgan shaxs ushlandi
Hozirda unga nisbatan jinoiy ish ochilgan.
Namanganda qariyb 80 mln Rossiya rublini Qirg‘izistonga o‘tkazmoqchi bo‘lgan shaxs ushlandi.
Davlat xavfsizlik xizmatining Namangan viloyati bo‘yicha boshqarmasi xodimlari tomonidan o‘tkazilgan tezkor tadbirda juda ko‘p miqdordagi xorijiy valyutalarni noqonuniy ravishda Qirg‘izistonga o‘tkazmoqchi bo‘lgan shaxs qo‘lga olindi.
Qirg‘iz Respublikasining Jalolobod viloyati Ola-buqa tumani bilan chegaradosh bo‘lgan Namangan viloyatining Yangiqo‘rg‘on tumani hududidan o‘tuvchi “o‘zbek-qirg‘iz” davlat chegarasi tomon harakatlanayotgan, Namangan shahrida yashovchi, 1990 yilda tug‘ilgan fuqaro boshqaruvidagi “Lasetti” rusumli avtomashina to‘xtatilib, ko‘zdan kechirilganda, uning salonida 3 dona polietilen qoplarga joylashtirilgan jami 79 mln 994 ming 900 Rossiya rubli borligi maʼlum bo‘ldi.
Aniqlanishicha, ushbu shaxs pullarni chegaradan o‘tkazib berishi evaziga 300 AQSH dollari olishi kerak bo‘lgan.
Holat yuzasidan mazkur fuqaroga nisbatan Jinoyat Kodeksining 25,182-moddasi 2-qismi “a” bandi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
