Buxoroda 9 kishining hayoti saqlab qolindi
Buxoroda ko‘p qavatli uyda yuz bergan yong‘in tutuni tufayli pastki qavatdagi aholi evakuatsiya qilindi.
8-iyul kuni soat 16:47 da Buxoro viloyati, Buxoro shahri “A. G‘ijduvoniy” mahallasida joylashgan ko‘p qavatli uyning yer to‘lasida yong‘in yuz bergani to‘g‘risida Favqulodda vaziyatlar boshqarmasiga xabar kelib tushgan.
Voqea joyiga zudlik bilan 4 ta yong‘in-qutqaruv ekipaji jalb qilinib, ular soat 16:51 da yetib borgan va yong‘in soat 17:03 da to‘liq bartaraf etilgan.
Dastlabki ma’lumotlarga ko‘ra, yer to‘lada taxminan 20 kvadrat metr maydonda chiqindilar yonib ketgan. Yong‘in natijasida binoning kirish eshigi va yo‘laklari tutun bilan to‘lgan.
Shu sababli, 1–3-qavatlarda yashovchi 9 nafar fuqaro Favqulodda vaziyatlar vazirligi qutqaruvchilari tomonidan xavfsiz hududga evakuatsiya qilinib, birinchi tibbiy yordam ko‘rsatilgan. Hodisa oqibatida tan jarohati olganlar qayd etilmagan.
Yong‘in sababi va yetkazilgan moddiy zarar miqdori aniqlanmoqda.
