Ixstisoslashgan maktablarning imtihon natijalari atrofida nimalar bo‘lyapti?
Tunda natijalar eʼlon qilinib o‘chirilgani, unda baʼzi yuqori ball to‘plaganlar o‘qishga qabul qilinmagani haqida xabarlar tarqaldi.
Kecha, 29 iyul kuni Telegramdagi botlar orqali Ixtisoslashgan maktablarga hujjat topshirgan o‘quvchilarning natijalari eʼlon qilingandi.
Ijtimoiy tarmoqlarda esa ayrim yuqori ball to‘plagan talabgorlar qabul qilinmagan, aksincha kamroq ball olganlar tavsiya etilgan holatlar aks etgan xabarlar tarqalgani kuzatildi.
Bu holatga Ixtisoslashtirilgan maktablar agentligi sobiq matbuot kotibi Jo‘rabek Jangirov munosabat bildirib, imtihon natijalarini bilish uchun tashlangan bot agentlik tomonidan o‘chirilganini va mavjudlari esa ishlamayotganini maʼlum qildi.
“Hozircha botlardagi natijalar noto‘g‘ri bo‘lishi mumkin. Hozirgi natijalarga ishonib xursand yoki xafa bo‘lib yurmang”, deb yozadi Jangirov.
Hozirda har ikki post ham uning sahifasidan o‘chirilgan.
Ixtisoslashgan maktablar agentligining maʼlum qilishicha, ijtimoiy tarmoqlarda Tayanch va hududiy ixtisoslashtirilgan maktablarga qabul imtihonlari bo‘yicha rasman tasdiqlanmagan maʼlumotlar tarqalmoqda.
Imtihon natijalari rasman eʼlon qilinmagan. Ayni paytda natijalarni shakllantirish ishlari yakuniy bosqichda.
“Ixtisoslashtirilgan taʼlim muassasalari agentligi imtihon natijalarini bugun kunning ikkinchi yarmida rasmiy sahifalari orqali eʼlon qilinishini maʼlum qiladi”, deyiladi rasmiy xabarda.
