Vino shishasi va qadoqlangan ziravorlar: Tailanddan O‘zbekistonga narkotik olib kirilishining oldi olindi
13 kgdan ortiq “gashish moyi”ning noqonuniy aylanmasiga chek qo‘yildi.
Bojxona xodimlari Tailanddan O‘zbekistonga 13 kilogrammdan ortiq narkotik modda olib kirilishiga chek qo‘ydi. Holat yuzasidan jinoyat ishi qo‘zg‘atilgan.
Bojxona qo‘mitasining “Toshkent-Aero” ixtisoslashtirilgan bojxona kompleksi tezkor tuzilmalari va “Toshkent xalqaro aeroporti” chegara bojxona posti xodimlari Davlat xavfsizlik xizmati bilan hamkorlikda tezkor tadbir o‘tkazgan.
5-sentyabr kuni Tailanddan uchib kelgan 51 yoshli O‘zbekiston fuqarosining bagajlari bojxona nazoratidan o‘tkazilganda, 3 ta vino shishasi va qadoqlangan ziravorlar o‘rami ichidagi moddalar xodimlarda shubha uyg‘otgan.
Bojxona qo‘mitasining Markaziy bojxona laboratoriyasida o‘tkazilgan ekspertiza natijasida shishalardagi to‘q jigarrang, o‘tkir hidli modda tarkibida tetragidrokannabinol mavjudligi aniqlangan. Modda O‘zbekistonda muomalasi taqiqlangan narkotik vosita — “gashish moyi” ekani ma’lum bo‘lgan. Uning og‘irligi 7 kilogramm 580 grammni tashkil etgan.
Surishtiruvlar davomida fuqaro Telegram’dagi “Absolyut” nomi ostida faoliyat yurituvchi “kurator” ko‘rsatmasiga ko‘ra, 1800 dollar evaziga narkotik moddalarni O‘zbekistonga olib kirib, Samarqand shahriga yetkazib berishi kerak bo‘lgani aniqlangan.
Tezkor tadbir Samarqand shahrida davom ettirilib, narkotik moddalarni qabul qilib olishi kerak bo‘lgan 47 yoshli fuqaro ham qo‘lga olingan. Uning yashash manzilini ko‘zdan kechirish vaqtida vino shishalari, idish yuvish geli qutisi va shprislarga joylangan “gashish moyi”, shuningdek, iste’mol qilinganda sarxushlik holatini keltirib chiqaruvchi quritilgan qo‘ziqorinlar aniqlangan.
Ushbu narkotik moddalarning umumiy og‘irligi qariyb 5,5 kilogrammni tashkil qilgan.
Shu tariqa, tezkor tadbirlar davomida jami 13 kilogramm 80 gramm “gashish moyi”ning noqonuniy aylanmasiga chek qo‘yilgan.
Mutaxassislar hisob-kitobiga ko‘ra, ushbu miqdordagi narkotik vosita qariyb 200 ming kishini giyohvandlikka jalb etish uchun yetarli bo‘lgan. Uning qora bozordagi qiymati oxirgi iste’molchiga yetib borguniga qadar 1,7 million dollardan oshishi mumkinligi qayd etilgan.
Holat yuzasidan bojxona organlari tomonidan jinoyat ishi qo‘zg‘atilgan.
