Saudiyadan Islom sivilizatsiyasi markazida namoyish etish uchun noyob artefaktlar olib kelindi
Saudiya Arabistoni Jidda shahridagi Islom sanʼati uyi Markaz ochilishi doirasida o‘tkaziladigan ko‘rgazmada namoyish etish uchun 13 ta nodir va qimmatbaho eksponatni taqdim etdi.
O‘zbekiston Respublikasi Prezidenti Shavkat Mirziyoyev tashabbusi bilan bunyod etilayotgan O‘zbekistondagi Islom sivilizatsiyasi markazi dunyodagi yetakchi ilmiy va madaniy muassasalar bilan yaqin hamkorlik olib bormoqda. Shu hamkorlikning yorqin namunasi sifatida Saudiya Arabistoni Jidda shahridagi Islom sanʼati uyi Markaz ochilishi doirasida o‘tkaziladigan ko‘rgazmada namoyish etish uchun 13 ta nodir va qimmatbaho eksponatni taqdim etdi.
Eksponatlar 2025 yil sentyabridan 2026 yil mart oyigacha O‘zbekistonda namoyish etiladi. Ular islom dunyosi tarixi, madaniyati va O‘zbekistonning maʼnaviy merosi bilan uzviy bog‘liq bo‘lib, yurtdoshlarimiz va xorijiy mehmonlarga boy tarixiy xazina bilan yaqindan tanishish imkonini beradi.
Markaz ilmiy xodimi Elyor Mullajonov taʼkidlaganidek, eksponatlar orasida eng nodirlaridan biri — Mamluklar davridagi Muqaddas Kaʼba kalitlari jezdan yasalgan, kumush bilan bezatilgan va Qurʼon oyatlari o‘yib yozilgan noyob asar hisoblanadi.
Ko‘rgazmada namoyish etiladigan asarlar turli davr va hududlarga mansub bo‘lib, ular orasida:
▪️G‘aznaviylar davridagi qumgan — o‘yma naqshlar bilan bezatilgan quyma bronza namunasi;
▪️Saljuqiylar davridagi siyohdon — toshdan o‘yilgan badiiy asar;
▪️Ilk islom davri sopol laganlari — hijriy IV–V asrlarda yaratilgan;
▪️Qurʼon qo‘lyozmalari — Sharqiy kufiy va nasx xatda bezakli nusxalar;
▪️Abu Ali ibn Sinoning “Tib qonuni” asaridan sahifalar — 1549 yildagi ilk nashrdan;
▪️Mahmal — Kaʼba kisvasini tashishda ishlatilgan marosimiy hovlid;
▪️Hazrati Ibrohim maqomi pardasi — Usmoniylar davrida tikilgan noyob asar;
▪️Shaxmat toshlari — hayvon suyagidan o‘yilgan o‘yin jihozlari;
▪️Tarixiy kitob muqovasi — oltin va bo‘yoqlar bilan bezatilgan Markaziy Osiyo namunasi.
Mazkur hamkorlik nafaqat islom dunyosi madaniy merosini keng targ‘ib etadi, balki Saudiya Arabistoni va O‘zbekiston o‘rtasidagi madaniy aloqalarni mustahkamlash, ilm-fan va sanʼat sohasida tajriba almashishda muhim qadam bo‘lib xizmat qiladi.
