Hindiston va Bangladesh fuqarolarini OTMlarga qabul qilmaslik bo‘yicha ko‘rsatma berildimi?

Oliy ta’lim, fan va innovatsiyalar vazirligi davlat va nodavlat oliy ta’lim tashkilotlariga Hindiston hamda Bangladesh fuqarolarini talabalikka qabul qilmaslik bo‘yicha og‘zaki ko‘rsatma bergani haqida tarqalgan xabarlar rad etildi.

 

Vazirlik ma’lumotiga ko‘ra, joriy o‘quv yilidan boshlab xorijlik abituriyentlarni O‘zbekistondagi oliy ta’lim tashkilotlariga qabul qilish jarayoni “Study in Uzbekistan” yagona elektron platformasi orqali amalga oshirilmoqda.

 

Platforma orqali xorijlik abituriyentlar O‘zbekistondagi oliy ta’lim tashkilotlari, ta’lim dasturlari, qabul shartlari va to‘lovlar haqida ma’lumot olishi, hujjatlarini elektron tarzda topshirishi va ariza holatini kuzatishi mumkin.

 

Vazirlikning qayd etishicha, yangi tizim xorijlik abituriyentlar uchun qabul jarayonini ochiq va shaffof qilish, ularni vositachilarga bog‘liq holatdan chiqarish hamda oliy ta’lim tashkilotlari bilan to‘g‘ridan-to‘g‘ri muloqot qilish imkonini berishga qaratilgan. Platformada ro‘yxatdan o‘tish bepul.

 

Shuningdek, vazirlik O‘zbekiston xorijiy talabalar oqimini cheklashdan emas, uni kengaytirishdan manfaatdorligini ma’lum qildi. Bunda xorijiy talabalar geografiyasini kengaytirish va ta’lim eksportini rivojlantirish maqsad qilingan.

 

Xorijiy talabalarni qabul qilish hajmi esa har bir oliy ta’lim tashkilotining imkoniyatlaridan kelib chiqib belgilanadi. Bunda o‘quv auditoriyalari, laboratoriya bazasi, professor-o‘qituvchilar salohiyati, talabalar turar joylari va boshqa infratuzilma imkoniyatlari hisobga olinadi.

 

Vazirlik xorijlik abituriyentlarga O‘zbekistonda ta’lim olish bo‘yicha rasmiy “Study in Uzbekistan” platformasidan foydalanish, qabul shartlari haqida ma’lumotni bevosita tanlangan oliy ta’lim tashkilotidan olish va vositachilarga asossiz to‘lovlarni amalga oshirmaslikni tavsiya qildi.