Buxoro va Jizzaxda ham davlat bog‘chalari vaqtincha yopiladi
Viloyatlarda havo haroratining 43–45 darajagacha ko‘tarilishi prognoz qilinmoqda.
Buxoro viloyati va Jizzax shahrida anomal issiq ob-havo sabab davlat maktabgacha ta’lim tashkilotlari faoliyati vaqtincha to‘xtatiladi.
Buxoro viloyati hokimligi matbuot xizmati ma’lum qilishicha, viloyatda havo haroratining 44–45°C gacha ko‘tarilishi kutilayotgani hamda Sanitariya-epidemiologik osoyishtalik va jamoat salomatligi boshqarmasi xulosasiga asosan 2026-yil 15–17-iyul kunlari barcha davlat maktabgacha ta’lim tashkilotlari faoliyati vaqtincha to‘xtatiladi.
Davlat bog‘chalari 20-iyuldan boshlab odatiy tartibda o‘z faoliyatini davom ettiradi.
Rasmiy xabarda ota-onalardan mazkur cheklovni bolalar salomatligi va xavfsizligini ta’minlashga qaratilgan profilaktik chora sifatida to‘g‘ri qabul qilish hamda ushbu kunlarda farzandlar salomatligiga alohida e’tibor qaratish so‘ralgan.
Shuningdek, Jizzax shahri hokimining farmoyishiga ko‘ra, anomal issiq ob-havo va havo haroratining 41–43°C gacha ko‘tarilishi prognoz qilinayotgani sababli 2026-yil 15–17-iyul kunlari Jizzax shahridagi davlat maktabgacha ta’lim tashkilotlari faoliyati ham vaqtincha to‘xtatiladi.
Mazkur qarorlar bolalar salomatligini muhofaza qilish va yuqori haroratning salbiy ta’sirini oldini olish maqsadida qabul qilingan.
Eslatib o‘tamiz, avvalroq jazirama issiq sabab Qoraqalpog‘iston Respublikasi, Xorazm va Navoiy viloyatidagi davlat maktabgacha ta’lim tashkilotlari faoliyati ham vaqtincha to‘xtatilgani ma’lum qilingan.
