Toshkent viloyatidagi barcha bog‘chalar anomal issiq sabab vaqtincha yopildi
Davlat va nodavlat maktabgacha ta’lim tashkilotlari faoliyati 16-iyuldan vaqtincha to‘xtatildi.
Toshkent viloyatida kuzatilayotgan anomal issiq ob-havo sabab barcha davlat, nodavlat va idoraviy maktabgacha ta’lim tashkilotlari faoliyati vaqtincha to‘xtatildi.
Ma’lum qilinishicha, viloyat hokimi Zoir Mirzayev raisligida o‘tkazilgan yig‘ilishda tuman va shahar hokimliklariga 16-iyuldan boshlab barcha davlat, xususiy hamda idoraviy bog‘chalar faoliyatini vaqtincha to‘xtatish bo‘yicha topshiriq berilgan.
Qayd etilishicha, maktabgacha ta’lim tashkilotlari faoliyati ob-havo me’yoriy holatga kelgach, Toshkent viloyati hokimligining qo‘shimcha qarori asosida qayta tiklanadi.
Eslatib o‘tamiz, anomal issiq sabab avvalroq Qoraqalpog‘iston Respublikasidagi ayrim bog‘chalar 17–18-iyulgacha, Xorazm viloyatidagi barcha davlat bog‘chalari 14–17-iyul kunlari vaqtincha yopilgandi. Shuningdek, Navoiy viloyatida ayrim davlat bog‘chalari faoliyati to‘rt kunga to‘xtatilgan, Buxoro viloyatidagi barcha bog‘chalar 15-iyuldan yopilgan, Farg‘ona viloyatidagi davlat va nodavlat maktabgacha ta’lim tashkilotlari esa 16–17-iyul kunlari ishlamasligi ma’lum qilingandi.
