Бухоро ва Жиззахда ҳам давлат боғчалари вақтинча ёпилади
Вилоятларда ҳаво ҳароратининг 43–45 даражагача кўтарилиши прогноз қилинмоқда.
Бухоро вилояти ва Жиззах шаҳрида аномал иссиқ об-ҳаво сабаб давлат мактабгача таълим ташкилотлари фаолияти вақтинча тўхтатилади.
Бухоро вилояти ҳокимлиги матбуот хизмати маълум қилишича, вилоятда ҳаво ҳароратининг 44–45°С гача кўтарилиши кутилаётгани ҳамда Санитария-эпидемиологик осойишталик ва жамоат саломатлиги бошқармаси хулосасига асосан 2026 йил 15–17 июль кунлари барча давлат мактабгача таълим ташкилотлари фаолияти вақтинча тўхтатилади.
Давлат боғчалари 20 июлдан бошлаб одатий тартибда ўз фаолиятини давом эттиради.
Расмий хабарда ота-оналардан мазкур чекловни болалар саломатлиги ва хавфсизлигини таъминлашга қаратилган профилактик чора сифатида тўғри қабул қилиш ҳамда ушбу кунларда фарзандлар саломатлигига алоҳида эътибор қаратиш сўралган.
Шунингдек, Жиззах шаҳри ҳокимининг фармойишига кўра, аномал иссиқ об-ҳаво ва ҳаво ҳароратининг 41–43°С гача кўтарилиши прогноз қилинаётгани сабабли 2026 йил 15–17 июль кунлари Жиззах шаҳридаги давлат мактабгача таълим ташкилотлари фаолияти ҳам вақтинча тўхтатилади.
Мазкур қарорлар болалар саломатлигини муҳофаза қилиш ва юқори ҳароратнинг салбий таъсирини олдини олиш мақсадида қабул қилинган.
Эслатиб ўтамиз, аввалроқ жазирама иссиқ сабаб Қорақалпоғистон Республикаси, Хоразм ва Навоий вилоятидаги давлат мактабгача таълим ташкилотлари фаолияти ҳам вақтинча тўхтатилгани маълум қилинган
