Shavkat Mirziyoyev xorijdagi fojialar munosabati bilan hamdardlik bildirdi
Xitoy va Nepaldagi tabiiy ofatlar, shuningdek, Pokistondagi yong‘in oqibatida halok bo‘lgan marhumlarning yaqinlariga sabr-toqat, jabrlanganlarga esa tezroq sog‘ayishni tiladi.
O‘zbekiston Respublikasi Prezidenti Shavkat Mirziyoyev Xitoyning Tibet avtonom rayonidagi Shigadze shahar okrugida va Nepalning Tibet bilan chegarasida yuz bergan keng ko‘lamli ko‘chki va toshqin oqibatida ko‘plab insonlar halok bo‘lgani, jarohatlangani hamda katta iqtisodiy talafot ko‘rilgani munosabati bilan Xitoy Xalq Respublikasi Raisi Si Szinpin va Nepal Prezidenti Ram Chandra Paudelga hamdardlik yo‘lladi.
Shuningdek, Shavkat Mirziyoyev Islomobod shahridagi tibbiyot muassasasida yuz bergan kuchli yong‘in oqibatida ko‘plab bolalar halok bo‘lgani va jarohat olgani munosabati bilan Pokiston Islom Respublikasi Prezidenti Asif Ali Zardoriy va Bosh vaziri Shahboz Sharifga ham hamdardlik bildirdi.
Davlat rahbari vafot etganlarning oila a’zolari va yaqinlariga sabr-toqat, jarohat olganlar tez fursatda sog‘ayib ketishini tiladi.
Ma’lumot o‘rnida, tabiiy ofat oqibatida Nepalda kamida 165 kishi halok bo‘lgan, 826 kishi bedarak yo‘qolgan. Bedarak yo‘qolganlar orasida 500 ga yaqin xorijlik bor. Tibetning Jiro‘ng hududida esa 558 kishi, jumladan, 260 nafar xorijlik bedarak yo‘qolgan. Xitoy rasmiylariga ko‘ra, hududda uch kishi halok bo‘lgan. Hozirda Nepal va Tibetda qidiruv-qutqaruv ishlari davom etmoqda.
Pokistonda esa Tibbiyot fanlari instituti (PIMS) tug‘ruqxonasining yangi tug‘ilgan chaqaloqlar bo‘limida yong‘in sodir bo‘lib, kamida 14 chaqaloq halok bo‘lgandi.
