Davlat rahbarining aholiga arzon va sifatli yoqilg‘i mahsulotlarini yetkazib berish bo‘yicha topshiriqlari ijrosi doirasida Buxoro neftni qayta ishlash zavodida AI-92 rusumli avtobenzin narxi bosqichma-bosqich kamaytirildi. “O‘zbekneftgaz” AJga ko‘ra, bu chora ichki yoqilg‘i bozorini barqarorlashtirish va iste’molchilar manfaatlarini qo‘llab-quvvatlashga qaratilgan.
Kompaniya strategiyasi doirasida ishlab chiqarish jarayonlari optimallashtirildi, tannarxni kamaytirish bo‘yicha kompleks chora-tadbirlar amalga oshirildi. Natijada ishlab chiqarish hajmi oshib, narx pasayishiga erishildi.
Buxoro NQIZda ishlab chiqarilgan AI-92 avtobenzinning birja savdolaridagi 1 tonnasi boshlang‘ich narxi 12 mln 881 ming so‘mdan 12 mln 628 ming so‘mga tushirildi. Bu esa bir litr AI-92 benzinning birjadagi boshlang‘ich narxi 9 400 so‘mni tashkil etishini bildiradi.
“O‘zbekneftgaz” AJ ma’lum qilishicha, yuqori oktanli yoqilg‘i narxlarini bosqichma-bosqich pasaytirish ishlari davom ettiriladi. Mutaxassislarning fikricha, bu qaror nafaqat iste’molchilarga qulay sharoit yaratadi, balki butun yoqilg‘i bozoriga ijobiy ta’sir ko‘rsatadi.