Бухорода портлаш юз бериб, 4 киши ҳалок бўлди
Президент топшириғи билан жабрланганларга ёрдам кўрсатиш мақсадида махсус комиссия тузилди.
6 декабрь куни соат 09:40 да Бухоро вилояти Когон тумани “Мустақиллик” маҳалла ҳудудида жойлашган “SHAMS LTD” МЧЖга тегишли портловчи моддалар ишлаб чиқариш цехида чақнаш содир бўлди ва натижада ёнғин юзага келди. Фавқулодда вазият тўғрисидаги хабар келиб тушган заҳоти Бухоро вилояти ФВБнинг 7 та қутқарув бўлинмаси воқеа жойига етиб бориб, ёнғинни соат 10:27 да тўлиқ бартараф этди.
Ташкилот 2019 йилдан буён тоғ-кон саноати корхоналарига портловчи моддалар етказиб бериш билан шуғулланиб келади. Ҳодиса содир бўлган пайтда цехнинг омбор қисмида 30 нафар ходим бўлган. Чақнаш оқибатида 4 нафар ишчи ҳалок бўлди. Енгил тан жароҳати олган 4 нафар ходим шифокорлар кузатувига олинган, улардан 2 нафари амбулатор ёрдамдан сўнг уйига қайтишга рухсат берилган.
Ўзбекистон Президенти топшириғи билан Саноат хавфсизлиги қўмитаси раиси А. Рафиқов бошчилигида вазирлик ва идоралар вакилларидан иборат Ҳукумат комиссияси тузилди. Комиссияга жабрланганларга зарур ёрдам кўрсатиш, ҳодиса оқибатларини бартараф этиш, сабабларни ўрганиш ва келгусида бундай ҳолатларнинг олдини олиш вазифалари юклатилди.
Ҳозирда воқеа жойи тўлиқ назоратга олинган бўлиб, тегишли хизматлар томонидан зарур чоралар кўрилмоқда.
