Эронда норозилик намойишлари туфайли интернетга кириш тақиқланди

Эрон ҳукумати мамлакат бўйлаб давом этаётган ҳукуматга қарши норозилик намойишлари сабабли интернетга киришни вақтинча чеклади. Бу ҳақда IT инфратузилмасини мониторинг қилувчи Cloudflare компанияси маълум қилди.

 

Қайд этилишича, 3 январ куни Эронда интернет трафик ҳажми қисқа вақт ичида қарийб учдан бир қисмга камайган. 4-январ тонгида эса интернет фаоллиги одатий кўрсаткичдан деярли 15 фоизга паст бўлган. Ижтимоий тармоқларда кўплаб фойдаланувчилар кенг кўламли узилишлар кузатилганини билдирган.

 

Эслатиб ўтилишича, Эрон ҳукумати аввал ҳам 2009, 2019 ва 2022 йиллардаги норозиликлар чоғида, шунингдек, 2025 йил июнь ойида Исроил ҳужумлари пайтида интернетга киришни чеклаган. Айрим ҳолларда фақат чекланган сонли расмий сайтлар ишлаган.

 

Норозилик намойишлари чоғида қурбонлар борлиги ҳақида ҳам хабарлар келмоқда. Hengaw Инсон ҳуқуқлари ташкилоти маълумотларига кўра, 3 январ куни Эрон ғарбидаги Илом вилоятининг Малекшоҳи туманида Ислом инқилоби қўриқчилари корпуси (IRGC) томонидан намойишчиларга қарата ўт очилган. Натижада камида тўрт киши ҳалок бўлган, ўнлаб фуқаролар жароҳат олган.

 

Норвегияда жойлашган Iran Human Rights (IHR) ташкилоти ҳам камида тўрт нафар фуқаро ҳалок бўлгани ва 30 киши яралангани ҳақида маълум қилди. Шу билан бирга, Эроннинг Mehr ахборот агентлиги тўқнашувлар вақтида IRGCнинг бир нафар ходими ҳалок бўлганини хабар қилди.

 

Норозилик намойишлари 2025 йил 28 декабрда бошланган. Дастлаб Теҳрон ва бошқа шаҳарларда тадбиркорлар иқтисодий вазиятнинг ёмонлашуви, юқори инфляция ва Ғарб санкцияларига қарши норозилик сифатида дўконларини ёпишган. Кейинчалик намойишлар сиёсий тус олиб, айрим ҳудудларда тўқнашувларга айланган.

 

Маълумотларга кўра, Эрон иқтисодиёти ҳозирда 40 фоиздан ортиқ инфляция ва халқаро санкциялар босими остида қолмоқда.

 

АҚШ президенти Доналд Трамп 2 январ куни Эрон ҳукумати тинч намойишчиларга нисбатан зўравонлик қўлласа, Қўшма Штатлар аралашиши мумкинлиги ҳақида огоҳлантирган.