Isroil hukumati G‘azo sektorida hali ham elektri bor oxirgi inshootni ham quvvat manbaidan uzdi. Energetika vaziri Eli Koen bu qaror garovga olingan fuqarolarni ozod qilish uchun bosim o‘tkazish maqsadida qabul qilinganini aytdi.
Hamas bu harakatni “genotsid urushining davom etishi” deb atadi va xalqaro qonunlarga zid ekanligini taʼkidladi. G‘azoliklar asosan generatorlar va quyosh energiyasidan foydalanishga majbur bo‘lib qolgan.
Shu bilan birga, Qohirada sulh muzokaralari davom etmoqda. AQSH vositachiligida Isroil va Hamas o‘rtasida kelishuvga erishishga harakat qilinmoqda, biroq tomonlar hali yakuniy qarorga kelmagan.
Isroilda ayrim siyosatchilar G‘azodagi yoqilg‘i omborlari va generatorlarni nishonga olishni talab qilmoqda. Ular garovdagi fuqarolar ozod qilinmaguncha hududga hech qanday energiya resurslari yetkazib berilmasligini taʼkidlamoqda.