Жо Байденда коронавирус аниқланди
Оқ уй матбуот хизмати президентнинг аҳволи ҳақида баёнот берди.
Оқ уй матбуот хизмати 18 июль, пайшанбага ўтар кечаси АҚШ президенти Жо Байден коронавирусга чалинганини маълум қилди.
Матбуот хизматининг таъкидлашича, 81 ёшли етакчи COVID-19’га қарши эмланган. Шу жумладан, кучайтирувчи укол олган ва фақат юқори нафас йўлларида касалликнинг енгил аломатлари, яъни бурун оқиши ва қуруқ йўтални бошдан кечирмоқда. Даволовчи шифокор АҚШ президентининг умумий аҳволи қониқарли эканини билдирди.
Байден коронавирус аниқланганидан сўнг ўзини "яхши" ҳис қилаётганини айтди. Унинг касаллангани ҳақидаги хабар Невададаги тадбирда бўлганида келди. Оқ уйнинг хабар беришича, президент Делавэрдаги уйига қайтиб, ўзини изоляция қилиш ниятида, бу вақт давомида у давлат раҳбари сифатида вазифаларини тўлиқ бажаришда давом этади.
Байден соғлиғи билан боғлиқ муаммолар туфайли номзодини қўйиш қарорини қайта кўриб чиқишга тайёр.
Аввалроқ, 17 июл куни Жо Байден журналист Эд Гордонга берган интервьюсида фақат соғлиғи билан боғлиқ шароит уни иккинчи президентлик муддатига номзодини қўйиш қарорини қайта кўриб чиқишга мажбур қилишини тан олганди.
