AQSH prezidenti Donald Tramp va Rossiya rahbari Vladimir Putin 16-oktyabr kuni telefon orqali muloqot o‘tkazdi. Oq uy va Kreml bayonotlariga ko‘ra, suhbat “samarali va konstruktiv” tarzda o‘tgan.
Tomonlar Ukraina urushi, xavfsizlik, energiya bozorlari hamda ikki tomonlama munosabatlarni muhokama qilgan. Suhbat yakunida Tramp va Putin Budapeshtda uchrashish bo‘yicha kelishib oldi. Uchrashuv yaqin haftalarda bo‘lishi kutilmoqda.
“Biz mazmunli suhbat o‘tkazdik. Rossiya bilan tinchlik yo‘lida muhim qadam tashlashga yaqinmiz”, — dedi Tramp suhbatdan so‘ng.
Ukraina masalasi suhbatning asosiy nuqtasi bo‘ldi. AQSHning Ukrainaga «Tomahavk» raketalarini berish ehtimoli muhokama qilindi. Putin bu qaror Rossiya–AQSH aloqalariga salbiy taʼsir ko‘rsatishini ogohlantirdi.
Tramp bu muloqotni urushni diplomatik yo‘l bilan tugatish uchun “yangi bosqich” deb atadi. Ammo tahlilchilar, bu yaqinlashuv NATO ittifoqchilari orasida turli qarama-qarshi munosabatlarni keltirib chiqarishi mumkinligini taʼkidlashmoqda.
Budapeshtda kutilayotgan uchrashuv global siyosatda yangi diplomatik burilish yasashi mumkin.