Маданий ва Маърифий телеканаллар: янги форматлар ва халқаро ҳамкорлик
Марказий Осиё мамлакатлари ОАВ раҳбарлари ва мутахассислари ўртасида замонавий медиа ва халқаро лойиҳалар муҳокама қилинди.
Ислом цивилизацияси марказида "Марказий Осиё: умумий маънавий маърифий мерос – умумий келажак” халқаро конгресси доирасида "Маданий ва Маърифий телеканаллар: янги форматлар ва халқаро ҳамкорлик мавзуда йиғилиш бўлиб ўтди.
Конгресс доирасидаги илм ва инновация, анъана ва технология уйғунлашган янги форматдаги шўба йиғилишида Ўзбекистон, Озарбайжон, Қозоғистон, Қирғизистон, Тожикистон ва Туркманистон ОАВ раҳбарлари, телеканаллар продюсерлари ва соҳа мутахассислари иштирок этди.
Юқори даражада бўлиб ўтган йиғилиш қизғин кечди. Тадбирнинг бош ғояси –оммавий ахборот воситалари, хусусан маданий-маърифий телеканаллар фаолияти самарадорлигини ошириш, Марказий Осиё мамлакатларининг маънавий ва маданий меросини тарғиб этиш, илмий ва маърифий қадриятларни кенг ёритиш, шунингдек, глобал медиа маконида халқаро ўзаро ҳамкорлик платформасини яратишдан иборат.
Мазкур шўба йиғилиши қадимий қўлёзмалардан тортиб то интеллектуал алгоритмларгача бўлган йўл – бу нафақат технология, балки тафаккур эволюцияси экани таъкидланди.
Шунингдек, рақамли даврда ОАВ нинг ўрни ҳақида алоҳида тўхталиб ўтилди. Марказий Осиё давлатларининг хусусий ва давлат телеканалларидан ташриф буюрган мутахассислар ўз мамлакатларидаги телеканаллар ва уларнинг фаолияти ҳақида маълумот берди.
Бўлиб ўтган йиғилиш давомида маданий-маърифий телеканалларнинг замонавий медиа майдонидаги ўрни, ҳужжатли фильмлар, халқаро контент алмашинувни кенгайтириш, интерактив дастурлар ва рақамли медиаларни ривожлантириш, қўшма медиапроектларни амалга ошириш масалалари муҳокама қилинди.
Шунингдек, тадбир доирасида Ўзбекистонда маданий-маърифий телеканалларнинг ривожига бағишланган видеолавҳа намойиш этилди. Тадбир ОАВ вакиллари билан очиқ мулоқот ва савол-жавоб шаклида якунланди.
“Марказий Осиёнинг тарихий ва маданий мероси: ягона ўтмиш – умумий келажак” халқаро конгресси 15- ноябрь кунига қадар давом этади.
