Тошкентда ўқувчилар каналдан кўприк йўқлиги сабабли қувурлар орқали ўтишга мажбур бўлмоқда
Ҳокимлик Салар канали устида янги кўприк қурилиши яқин кунларда бошланишини маълум қилди.
Ижтимоий тармоқларда Тошкент шаҳрининг Сергели туманида мактаб ўқувчилари хавфсиз кўприк йўқлиги сабабли каналдан қувурлар орқали ўтаётгани акс этган видеолар тарқалди.
Маълумотларга кўра, ҳолат Жўнариқ маҳалласи ҳудудида кузатилган. У ерда биринчи синф ўқувчилари ҳамда бошқа мактаб ўқувчилари мактабга бориш учун тор сув йўли устига ўрнатилган қувурлардан фойдаланишга мажбур бўлаётгани айтилмоқда. Бу эса болаларнинг ҳар куни ўз ҳаётини хавф остига қўйиб йўл босишига сабаб бўлмоқда.
Ҳолат юзасидан Сергели туман ҳокимлиги расмий муносабат билдирди. Идора маълумотига кўра, видео Юқори Дархон маҳалласи ва Жўнариқ маҳаллалари туташган ҳудудда олинган.
Қайд этилишича, Салар канали устидан ўтувчи кўприкни қайта қуриш бўйича Тошкент шаҳар ҳокимининг тегишли қарорлари қабул қилинган.
Маълум қилинишича, қурилиш ишлари яқин 5–10 кун ичида бошланиши режалаштирилган. Лойиҳа доирасида янги кўприк қуриш, пиёдалар учун алоҳида йўлаклар ташкил этиш ҳамда йўл қопламасини таъмирлаш ишлари амалга оширилади.
