Birlashgan Millatlar Tashkiloti Bosh Assambleyasining 80-yubiley sessiyasi doirasida O‘zbekiston Respublikasi Prezidenti Shavkat Mirziyoyev Iordaniya Podshohi Abdulla II ibn al-Husayn va Chexiya Respublikasi Prezidenti Petr Pavell bilan uchrashuvlar o‘tkazdi.
Iordaniya yetakchisi bilan muloqotda joriy yil avgust oyida Toshkentda erishilgan oliy darajadagi kelishuvlarni amalga oshirish masalalari muhokama qilindi. Xususan, ikki mamlakatning yetakchi kompaniyalari ishtirokida ustuvor investitsiya loyihalarini jadallashtirish bo‘yicha qo‘shma choralar ko‘rishga alohida e’tibor qaratildi.
Chexiya prezidenti bilan uchrashuv chog‘ida esa savdo-iqtisodiy hamkorlikni yanada kengaytirish, transport, qishloq xo‘jaligi, innovatsiyalar va boshqa yo‘nalishlarda aniq loyihalarni amalga oshirish muhokama qilindi. Shuningdek, idoralararo aloqalarni faollashtirishga kelishib olindi.