Норматив-ҳуқуқий ҳужжатлар лойиҳаларини лингвистик экспертизадан ўтказиш тартиби белгиланди
Ҳукумат қарори билан Норматив-ҳуқуқий ҳужжатлар лойиҳаларини лингвистик экспертизадан ўтказиш тартиби тўғрисидаги низом тасдиқланди.
Унга кўра, 2023 йил 1 январдан норматив-ҳуқуқий ҳужжатлар лойиҳалари вазирлик, идоралар билан келишишдан олдин лингвистик экспертизадан ўтказилади.
Лойиҳалар экспертизадан қуйидаги талаблар асосида ўтказилади:
1. жумлаларнинг соддалиги ва қисқалиги, таърифларнинг аниқлиги;
2. имло, услубий, грамматик ва орфография қоидаларига мослиги;
3. янги атамалар, шунингдек, соҳа атамаларининг тўғри қўлланилганлиги;
4. сўз бирикмаларининг ўзаро тўғри боғланганлиги;
5. баённинг тизимлилиги ва ифодали кетма-кетлиги.
Шунингдек, мутахассис шартномада белгиланган уч кун муддат ичида лингвистик экспертизадан ўтказиш натижаси бўйича аниқланган хато ва камчиликларни бартараф этиш юзасидан тавсияларни кўрсатган ҳолда хулоса бериб, лойиҳани ишлаб чиқувчига тақдим этади.
Лойиҳа матни қайта ишланиб, келишиш учун вазирлик ва идораларга юборилади. Лойиҳада оғзаки нутқ шакллари, давлат тилида тенг маъноли сўзлар ва тушунчалар мавжуд бўлган тақдирда чет тиллари атамаларини ишлатишга йўл қўйилмайди.
Шу билан бирга, эскирган ҳамда кўп маънони англатадиган сўзлар ва иборалар, мажозий таққослашлар, сифатлашлар, киноялар ҳам мумкин эмас.
Эслатиб ўтамиз, бундан аввал мактабларда инклюзив таълимни ташкил этиш тартиби белгиланди.
Чўлпоной Аҳмедова
