O‘zbekiston Respublikasi Prezidenti Shavkat Mirziyoyev 5-oktabr kuni Tojikiston Respublikasi Prezidenti Emomali Rahmon bilan telefon orqali muloqot o‘tkazdi. Suhbat davomida davlat rahbari Emomali Rahmonni tug‘ilgan kuni bilan samimiy tabriklab, unga mustahkam sog‘lik, baxt-saodat hamda Tojikiston xalqiga farovonlik va izchil taraqqiyot tiladi.
Prezident Shavkat Mirziyoyev Emomali Rahmonning mamlakat mustaqilligini mustahkamlash, barqaror rivojlanishini ta’minlash va xalqaro maydondagi nufuzini oshirishga qo‘shgan ulkan hissasini alohida qayd etdi.
Suhbat chog‘ida O‘zbekiston va Tojikiston o‘rtasidagi do‘stlik, yaxshi qo‘shnichilik va ittifoqchilik munosabatlarini yanada mustahkamlash, shuningdek, yuqori darajada erishilgan kelishuvlarni amalga oshirish masalalari muhokama qilindi.
Tomonlar savdo, sanoat kooperatsiyasi, transport, energetika, qishloq xo‘jaligi, turizm hamda madaniy-gumanitar aloqalarni rivojlantirishga qaratilgan amaliy hamkorlikni kengaytirish zarurligini ta’kidladilar.
Shuningdek, mamlakatlar o‘rtasida bo‘lib o‘tadigan oliy darajadagi ikki va ko‘p tomonlama tadbirlar rejalari ham ko‘rib chiqildi.