Bosh prokuratura tomonidan pora evaziga davlat xizmatlari markazlari orqali haydovchilik guvohnomalarini noqonuniy rasmiylashtirish bilan bog‘liq jinoiy holat fosh etildi.
Aniqlanishicha, davlat xizmatlari markazining bosh mutaxassisi jinoiy sheriklari bilan birgalikda 2025-yil davomida ilgari haydovchilik guvohnomasiga ega bo‘lmagan 72 nafar fuqarodan jami 616 million so‘m miqdorida pora olib, ularga soxta hujjatlar asosida haydovchilik guvohnomalarini rasmiylashtirib bergan.
Mazkur holat yuzasidan davlat xizmatlari markazining bosh mutaxassisi va uning sheriklariga nisbatan pora olish, pora berish hamda rasmiy hujjatlarni qalbakilashtirish moddalarida ayblov e’lon qilinib, ularning barchasi qamoqqa olingan.
Jinoyatni o‘rganish jarayonida jinoiy guruh tomonidan soxta haydovchilik guvohnomalarini rasmiylashtirishning ikki xil usuli qo‘llangani aniqlangan.
Birinchi holatda, jinoiy guruh vakillari fuqarolardan 500–1000 AQSh dollari evaziga eski turdagi haydovchilik guvohnomalarini qo‘lbola usulda tayyorlab bergan. Ushbu qalbaki hujjatlar davlat xizmatlari markaziga topshirilib, xodimga pora berish orqali ularning o‘rniga yangi haydovchilik guvohnomalari rasmiylashtirilgan.
Ikkinchi holatda esa, fuqarolardan 10 ming AQSh dollarigacha bo‘lgan mablag‘ evaziga hududiy YHXB organlaridan berilgandek ko‘rsatilgan, soxta QR kod va imzolar bilan tasdiqlangan ma’lumotnomalar tayyorlangan. Ushbu soxta hujjatlar orqali ham yangi haydovchilik guvohnomalari olingan.
Har ikki holatda ham fuqarolar haydovchilik guvohnomasiga ega emasligini bila turib, go‘yoki hujjatlarini yo‘qotib qo‘yganliklari haqida davlat xizmatlari markaziga murojaat qilgan.
Natijada, 72 nafar fuqaro hujjatlarni qalbakilashtirish va davlat tashkiloti xodimiga pora berish jinoyatlariga sherik bo‘lgani aniqlangan.
Shuningdek, Bosh prokuratura tomonidan viloyatlarda o‘tkazilgan tekshiruvlar davomida jami 1200 dan ortiq qalbaki haydovchilik guvohnomalari aniqlangan. Jumladan, Toshkent shahrida 440 ta, Navoiy viloyatida 265 ta, Surxondaryo viloyatida 205 ta, Samarqand viloyatida 146 ta, Qashqadaryo viloyatida 33 ta, Sirdaryo viloyatida 20 ta hamda boshqa hududlarda 100 dan ortiq qalbaki hujjatlar fosh etilgan.
Hozirda mazkur qalbaki hujjatlar asosida rasmiylashtirilgan barcha haydovchilik guvohnomalari bekor qilingan bo‘lib, hujjatlarni tayyorlagan va sotib olgan shaxslarning jinoiy javobgarligi masalasi ko‘rib chiqilmoqda.