O‘zbekistonda ehtiyojmand oilalarni qo‘llab-quvvatlash doirasida bir oyda 1,2 trillion so‘m bir martalik moddiy yordam to‘lab berildi. Bu haqda Ijtimoiy himoya milliy agentligi maʼlum qildi.
Qayd etilishicha, ehtiyojmand oilalarga elektr energiyasi va tabiiy gaz isteʼmoli bo‘yicha bazaviy meʼyordan ortiq foydalanilgan qismi uchun kompensatsiya to‘lab berilmoqda. Jumladan, elektr energiyasi bo‘yicha oyiga bazaviy meʼyordan ortiq 150 kVt/soatgacha, tabiiy gaz bo‘yicha esa isitish mavsumida 250 kub metr, isitish mavsumidan tashqari davrda 150 kub metrgacha bo‘lgan ortiqcha isteʼmol uchun bazaviy va oshirilgan tariflar o‘rtasidagi farq qoplanadi.
Maʼlumotlarga ko‘ra, 2025 yil 1 maydan buyon bazaviy meʼyordan ortiq energiya isteʼmol qilgan 562,9 ming nafar ehtiyojmand oilaga jami 41,6 milliard so‘m kompensatsiya to‘lab berilgan. Shundan 30 milliard so‘m elektr energiyasi, 11,6 milliard so‘m esa tabiiy gaz uchun ajratilgan.
Shuningdek, o‘tgan yilning noyabr oyida 1 million 161 mingdan ortiq ehtiyojmand oilaga 1,2 trillion so‘m miqdorida bir martalik moddiy yordam moliyalashtirilgani qayd etildi.
Avvalroq, qaysi oilalar “kambag‘al oila” toifasiga kiritilishi haqida maʼlumot berilgandi. Taʼkidlanishicha, 2026 yil 1 fevraldan “Ijtimoiy himoya yagona reyestri” hamda Kambag‘al oilalar reyestri negizida yagona Ijtimoiy reyestr joriy etiladi.