O‘zbekistonda “Sunʼiy intellekt alyansi” tashkil etiladi. Bu haqida Prezident Shavkat Mirziyoyev raisligida sunʼiy intellekt texnologiyalarini rivojlantirish yuzasidan o‘tkazilgan videoselektor yig‘ilishida maʼlum qilindi.
“Biz 2030 yilga borib, sunʼiy intellekt bo‘yicha “TOP-50” ta davlat qatoriga kirishni maqsad qilganmiz. Shu bois, ilg‘or xorijiy tajribadan kelib chiqib, “Sunʼiy intellekt alyansi”ni tashkil qilamiz”, – deya taʼkidladi Prezident.
Ushbu alyans tarkibiga sohada samarali faoliyat yuritayotgan yetakchi kompaniyalar, xorijiy ekspertlar va vatandoshlarimiz, yirik davlat korxonalari, banklar va oliygohlar kiritiladi.
Alyansning asosiy vazifalari yetakchi xalqaro ilmiy-tadqiqot markazlari va akseleratorlar bilan hamkorlikni kuchaytirish, o‘zimizdagi dasturlar bo‘yicha media-kontentni yaratib, xalqaro PR kampaniyalarni tashkil etish, mahalliy korxonalar va mutaxassislarning xalqaro ko‘rgazma, forum va konferensiyalardagi ishtirokini tashkil etishdan iborat bo‘ladi.
Yig‘ilishda hudud va tarmoqlar rahbarlari hisobot berdi, sohadagi startaplar asoschilari va informatika o‘qituvchilarining fikrlari tinglandi.