Fransiyaning Paster instituti qoshidagi Nafas yo‘llari infeksiyalari markazi direktori Mari-Enn Ramey-Velti yuqori patogen H5 parranda grippi virusining global xavfi keskin ortib borayotganini ma’lum qildi. Bu haqda Reuters agentligi xabar bermoqda.
Mutaxassisning ta’kidlashicha, H5 virusi so‘nggi yillarda yuz millionlab parrandalar nobud bo‘lishiga sabab bo‘lgan, bu esa oziq-ovqat ta’minoti zanjiriga ham jiddiy ta’sir ko‘rsatmoqda. Insonlar orasida kasallanish holatlari hozircha juda kam uchrayotgani qayd etilgan, biroq virusning sutemizuvchilar va odamlarga moslashish ehtimoli eng katta xavf hisoblanadi.
“Agar virus odamdan odamga yuqish qobiliyatiga ega bo‘lsa, pandemiya boshlanishi mumkin. COVID-19 pandemiyasi boshida bo‘lgani kabi, H5ga qarshi ham aholida antikorlar mavjud emas,” — deydi Ramey-Velti.
Olimning fikricha, parranda grippi sog‘lom odamlarga ham jiddiy zarar yetkazishi mumkin, shu bois pandemiya COVID-19dan og‘irroq kechishi ehtimoldan xoli emas. AQShda parrandalar, qoramollar va ayrim odamlarda H5N1 aniqlangan holatlar qayd etilgan. Noyabr oyida Vashington shtatida birinchi bemor infeksiya oqibatida vafot etdi.
Shu bilan birga, mutaxassislar hozirgi global tayyorgarlik darajasi COVID-19dan yuqoriroq ekanini bildiradi — vaksina namunalari, antiviral dori zaxiralari va zarur texnologiyalar mavjud.
Butunjahon hayvonlar salomatligi tashkiloti ilmiy bo‘limi rahbari Gregorio Torresning qayd etishicha, hozircha pandemiya xavfi past darajada bo‘lib qolmoqda. “Tovuq go‘shti va tuxum iste’mol qilish uchun xavotirga asos yo‘q,” — dedi u.