Қирғизистон ва Тожикистон ҳам АҚШ виза депозити рўйхатига киритилди

 

АҚШ Президент маъмурияти фуқаролари АҚШга кириш визасини расмийлаштиришда нақд пул депозитини тўлашлари шарт бўлган давлатлар рўйхатини кенгайтирди. АҚШ Давлат департаменти расмий веб-сайтида эълон қилинган маълумотга кўра, мазкур рўйхатга яна 25 та давлат қўшилган.

 

Янги тартиб 21 январдан кучга киради. Унга мувофиқ, Жазоир, Ангола, Антигуа ва Барбуда, Бангладеш, Бенин, Бурунди, Кабо-Верде, Кот-дЪИвуар, Куба, Жибути, Доминика, Фижи, Габон, Қирғизистон, Непал, Нигерия, Сенегал, Тожикистон, Того, Тонга, Тувалу, Уганда, Вануату, Венесуэла ва Зимбабве фуқаролари виза аризасини топширишда 5 минг доллардан 15 минг долларгача миқдорда депозит тўлаши лозим бўлади.

 

Депозит миқдори виза суҳбати натижасига кўра белгиланади. АҚШ Давлат департаменти мазкур тўлов виза берилиши кафолати эмаслигини алоҳида таъкидлади.

 

Маълум қилинишича, виза рад этилган тақдирда ёки аризачи АҚШга киришда барча виза талабларига риоя қилган бўлса, тўланган маблағ қайтарилади.

 

Сўнгги ўзгаришларни инобатга олган ҳолда, виза депозити талаб қилинадиган давлатлар умумий сони 38 тага етди. Аввалроқ ушбу рўйхатга Туркманистон ҳам киритилган эди.