AQSH Prezident maʼmuriyati fuqarolari AQSHga kirish vizasini rasmiylashtirishda naqd pul depozitini to‘lashlari shart bo‘lgan davlatlar ro‘yxatini kengaytirdi. AQSH Davlat departamenti rasmiy veb-saytida eʼlon qilingan maʼlumotga ko‘ra, mazkur ro‘yxatga yana 25 ta davlat qo‘shilgan.
Yangi tartib 21 yanvardan kuchga kiradi. Unga muvofiq, Jazoir, Angola, Antigua va Barbuda, Bangladesh, Benin, Burundi, Kabo-Verde, Kot-dʼIvuar, Kuba, Jibuti, Dominika, Fiji, Gabon, Qirg‘iziston, Nepal, Nigeriya, Senegal, Tojikiston, Togo, Tonga, Tuvalu, Uganda, Vanuatu, Venesuela va Zimbabve fuqarolari viza arizasini topshirishda 5 ming dollardan 15 ming dollargacha miqdorda depozit to‘lashi lozim bo‘ladi.
Depozit miqdori viza suhbati natijasiga ko‘ra belgilanadi. AQSH Davlat departamenti mazkur to‘lov viza berilishi kafolati emasligini alohida taʼkidladi.
Maʼlum qilinishicha, viza rad etilgan taqdirda yoki arizachi AQSHga kirishda barcha viza talablariga rioya qilgan bo‘lsa, to‘langan mablag‘ qaytariladi.
So‘nggi o‘zgarishlarni inobatga olgan holda, viza depoziti talab qilinadigan davlatlar umumiy soni 38 taga yetdi. Avvalroq ushbu ro‘yxatga Turkmaniston ham kiritilgan edi.