Қишки Олимпия ўйинлари машъаласи ёқилди
Бугун Грециянинг қадимий Олимпия шаҳарчасида “Пекин-2022” қишки Олимпия ўйинлари машъаласи ёқилди.
Ушбу тадбирда Греция Президенти Катерина Сакелларопулу, Халқаро Олимпия Қўмитаси Президенти Томас Бах, Греция Миллий Олимпия қўмитаси раҳбарияти ва жаҳон спортининг таниқли вакиллари иштирок этди.
Пандемия сабаб мазкур маросим мухлисларсиз ўтказилди. Греция МОҚнинг маълум қилишича, машъала эстафетасини тоғ чанғиси бўйича таниқли грек спортчиси Иоаннис Антониу бошлаб беради. Шундан сўнг қадимий Панатинаикос стадионида машъалани бўлажак Олимпиада мезбони – Пекин шаҳри мутасаддилари ва мусобақа ташкилий қўмитаси вакиллари қабул қилиб олади.
Маълумотга кўра, ушбу тадбирга ҳам томошабинлар кириши ман этилади. Томас Бах бошчилигида ўтадиган маросимга аккредитациядан ўтган 200 нафар шахс кира олади. Машъала 19 октябрь куни Пекинга олиб кетилади.
Эслатиб ўтамиз, қишки Олимпия ўйинлари 2022 йилнинг 4-20 февраль кунлари бўлиб ўтади.
Аввалроқ Россия вакциналари билан эмланган спортчиларга ҳам қишки Олимпиядада иштирок этишга рухсат берилгани ва Халқаро Паралимпия қўмитаси президенти Ўзбекистонга келгани ҳақида хабар берилганди.
Жамшидбек Амиров
