Москва вилоятидаги кимё заводида портлашлар: етти киши ҳалок бўлгани айтилмоқда
Портлаш оқибатида вайрон бўлган бинода 44 киши бўлган.
Москва вилоятининг Краснозаводск шаҳридаги кимё заводида бир неча портлаш содир бўлди. Дастлабки маълумотларга кўра, ҳодиса оқибатида етти киши ҳалок бўлган, бироқ бу маълумот ҳозирча расман тасдиқланмаган.
Life.ru'нинг SHOT Telegram каналига таяниб хабар беришича, корхонанинг бир биноси тўлиқ қулаб тушган. Ҳодиса вақтида у ерда завод ходимлари бўлган.
Гувоҳлар камида учта портлаш овозини эшитганини билдирган. Маҳаллий аҳолининг сўзларига кўра, портлашлар кучи атрофдаги уйларнинг силкинишига сабаб бўлган.
Дастлабки маълумотларга кўра, вайрон бўлган бинода 44 киши бўлган. Улардан 40 нафари эвакуация қилинган, тўрт кишини қидириш ишлари давом этмоқда.
Ҳозир фавқулодда хизматлар ҳудуддаги очиқ ёнғинни чеклаш ва қутқарув ишларини олиб бормоқда.
Маълумот учун, аввалроқ Ярославль вилоятининг Кубринск қишлоғидаги корхонада ёнғин чиқиб, 14 киши ҳалок бўлган эди.
