Аичи-Нагоя-2026: Ўзбекистон делегацияси бир кунда 15 та медаль олди
Ўзбекистонлик спортчилар Осиё ўйинларининг навбатдаги кунида эшкак эшиш, каноэ ва байдарка, ўқ отиш, қиличбозлик ҳамда спорт гимнастикаси баҳсларида жами 15 та медални қўлга киритди.
Аичи-Нагоя-2026 Осиё ўйинларида Ўзбекистон делегацияси учун сермаҳсул кун бўлди. Спортчиларимиз бир кун давомида 5 та олтин, 7 та кумуш ва 3 та бронза медални қўлга киритиб, медаллар жамғармасини сезиларли даражада бойитди.
Кун Ўзбекистон делегацияси учун академик эшкак эшиш баҳсларидаги кумуш медаль билан бошланди. Эркаклар ўртасидаги M1x дастурида қатнашган Шаҳбоз Холмурзаев маррага иккинчи бўлиб етиб келиб, кумуш медалга сазовор бўлди. Кейин M2- дастурида Максим Голубев ва Алишер Турдиев 6:32.34 натижа билан учинчи ўринни эгаллаб, бронза медални қўлга киритди. Аёллар ўртасидаги W4- дастурида эса Анна Аксенова, Мария Сергеева, Райҳона Сатторова ва Айдана Сметуллаева иккинчи бўлиб финишга етиб келиб, кумуш медални қўлга киритди.
Каноэда эшкак эшиш баҳсларида Шоҳсанам Шерзодова аёллар ўртасидаги 200 метрга яккалик дастурида маррага биринчи бўлиб етиб келиб, Ўзбекистон делегациясига навбатдаги олтин медални тақдим этди. Байдарканинг аёллар ўртасидаги 500 метрга жуфтлик баҳсида Арина Танатмишева ва Екатерина Шубина учинчи ўринни эгаллаб, бронза медалга сазовор бўлди. Эркаклар ўртасидаги 500 метрга каноэ баҳсида эса Артур Гулиев ва Владлен Денисов маррага иккинчи бўлиб етиб келиб, кумуш медални қўлга киритди.
Академик эшкак эшиш баҳсларида Анна Пракотен аёллар ўртасидаги яккалик дастурида иккинчи ўринни эгаллаб, кумуш медаль соҳиби бўлди. Енгил вазнли спортчилар ўртасидаги LM2x дастурида эса жаҳон чемпионлари Шаҳзод Нурматов ва Собиржон Сафарәлиев маррага биринчи бўлиб етиб келиб, Ўзбекистон делегациясига олтин медаль келтирди.
Ўқ отиш баҳсларида ҳам Ўзбекистон вакили шоҳсупага кўтарилди. 10 метр масофадан пневматик тўппончадан отиш дастурида қатнашган Владимир Свечников 244,3 очко билан олтин медални қўлга киритди. У бу натижа билан Осиё ўйинлари рекордини ҳам янгилади. Мазкур олтин медаль Ўзбекистоннинг ўқ отиш бўйича Осиё ўйинларидаги 32 йиллик танаффусдан кейинги биринчи чемпионлигини таъминлади.
Академик эшкак эшишнинг W2-дастурида Айдана Сметуллаева ва Анна Аксенова иккинчи ўринни эгаллаб, яна бир кумуш медални делегацияга тақдим этди. M4x дастурида эса Давржон Давронов, Шаҳбоз Холмурзаев, Меҳрожбек Маматқулов ва Павел Сорин учинчи бўлиб финишга етиб келиб, бронза медални қўлга киритди. M4-дастурида Дилшод Худойбердиев, Фазлиддин Каримов, Алишер Турдиев ва Максим Голубев квартети эса маррага иккинчи бўлиб етиб келиб, кумуш медаль билан тақдирланди.
Қиличбозлик баҳсларида Зайнаб Дайибекова ҳам Ўзбекистон ҳисобига кумуш медаль қўшди. У финалда икки карра жаҳон чемпиони, мезбон Япония вакили Мисаки Эмурага 14:15 ҳисобида имкониятни бой берди.
Спорт гимнастикасида эса Ўткирбек Жўраев дастакли от машқида 14,733 балл жамғариб, олтин медални қўлга киритди.
