Осиё ўйинлари: Ўзбекистон U-23 жамоаси чорак финал йўлланмасини нақд қилди
Равшан Ҳайдаров шогирдлари муддатидан аввал гуруҳдан чиқиш вазифасини уддалади.
Футбол бўйича Ўзбекистон U-23 терма жамоаси Осиё ўйинларидаги иккинчи учрашувида Кувайтни 2:0 ҳисобида мағлуб этиб, муддатидан аввал чорак финал йўлланмасини қўлга киритди.
Кувайтга қарши баҳсда Сардор Баҳромов 6 ва 36-дақиқаларда гол уриб, дубль қайд этди.
Иккинчи бўлим бошида, 48-дақиқада Рўзибой Файзуллаев қизил карточка олди. Шундан сўнг Ўзбекистон бир киши кам бўлиб ҳаракат қилди. Бироқ жамоа ўз дарвозаси дахлсизлигини сақлаб қолди.
Шу тариқа, Равшан Ҳайдаров шогирдлари икки турдан сўнг 6 очко жамғариб, муддатидан аввал гуруҳдан чиқишни уддалади.
Жамоа гуруҳ босқичидаги сўнгги учрашувини 22 сентябрь куни Вьетнамга қарши ўтказади.
Маълумот ўрнида, чорак финал 25 сентябрь куни бўлиб ўтади. Ўзбекистон гуруҳни биринчи ўринда якунласа, «D» гуруҳининг иккинчи ўрин соҳиби билан баҳслашади.
Осиё ўйинлари. «С» гуруҳи, 2-тур
Кувайт U-23 — Ўзбекистон U-23 0:2
Голлар: Сардор Баҳромов, 6, 36.
Қизил карточка: Рўзибой Файзуллаев, 48.
