Роберто Фирмино “Ливерпул”ни тарк этади
У клубда саккиз йилдан бери ўйнаб келаётган эди.
“Ливерпул”нинг бразилиялик ҳужумчиси Роберто Фирмино жорий мавсум якунланганидан сўнг инглизлар жамоасини тарк этишга қарор қилди. Бу ҳақда инсайдер Флориан Плеттенберг хабар берди.
Манбанинг хабарига кўра, бразилиялик футболчи якуний қарорни қабул қилган. У қарорини шахсан “Ливерпул” бош мураббийи Юрген Клоппга айтган. Мерсисайдликлар устози ва Фирмино ўртасидаги суҳбат ижобий ўтди. Футболчи клуб билан шартномасини узайтирмайди ва ёзда “Ливерпул”ни текинга тарк этади.
31 ёшли Фирмино 2015 йилдан буён “Ливерпул”да тўп суради. Бразилиялик ҳужумчи “қизиллар” сафида 352 ўйин ўтказиб, 107 гол урган ва 78 голли узатмани амалга оширган. Фирмино “Ливерпул” билан биргаликда Англия чемпиони (2020) ва Чемпионлар лигаси ғолиби (2019) бўлди ва “Ливерпул” билан жами еттита совринни қўлга киритди.
