17-yanvar kuni Moskva shahrida Rossiya Prezidenti Vladimir Putin va Eron Prezidenti Masʼud Pezeshkian o‘zaro muzokaralar yakunida strategik hamkorlik to‘g‘risidagi ikki tomonlama shartnomani imzolashdi.
Imzolash marosimidan oldin ikki davlat rahbarlari ortasida Kreml saroyida uchrashuv o‘tkazildi.
Rossiya va Eron o‘rtasidagi munosabatlar 2001 yilda imzolangan “O‘zaro munosabatlar asoslari va hamkorlik tamoyillari to‘g‘risidagi shartnoma”ga muvofiq holda rivojlanib kelgan. Mazkur hujjat har besh yilda avtomatik ravishda uzaytiriladi. So‘nggi yillarda ikki davlat ushbu hujjat yangi geosiyosiy sharoit va hamkorlikning yuqori darajasiga javob bermasligini taʼkidlab kelishdi. 2022 yil yanvar oyida Eron Prezidenti Ibrohim Raisiy bilan Moskva tashrifi davomida yangi shartnoma ustida faol ish boshlashga kelishilgan edi.
Eronning Rossiyadagi elchisi Kazim Jaloliy maʼlum qilishicha, hujjat kirish so‘zi va 47 moddadan iborat bo‘lib, ikki davlat munosabatlarini kamida 20 yil davomida barcha sohalarda tartibga soladi.
Rasmiylarning taʼkidlashicha, ushbu hujjat harbiy ittifoq tuzishni nazarda tutmaydi. Eron tashqi ishlar vaziri Abbos Aroqchiyning qayd etishicha, shartnomada xavfsizlik va mudofaa sohalarida hamkorlik ko‘zda tutilgan, ammo u harbiy ittifoq tuzish maqsadini o‘z ichiga olmaydi.
Komila Odilova tayyorladi