Россияда меҳнат мигрантларини олдиндан танлаш ва тайёрлаш тизими жорий этилади

 

Россия ҳукуматининг қарорига мувофиқ, мамлакатда меҳнат мигрантларини мақсадли жалб қилиш бўйича тажриба лойиҳаси амалга оширилади. Лойиҳа Москва шаҳри ва Москва вилоятидан ташқари Россиянинг барча ҳудудларини қамраб олади. Бу ҳақда ТАСС хабар берди.

 

Тажриба доирасида хорижий фуқаролар Россияга киришдан аввал ўз мамлакатларида танлаб олинади ва ишга тайёрлашдан ўтказилади. Бунинг учун мигрантларни танлаш, ўқитиш ва ҳужжатлаштиришга мўлжалланган махсус инфратузилма яратилади.

 

Лойиҳани амалга ошириш учун Россия Ички ишлар вазирлиги ва Меҳнат вазирлиги бошқа тегишли федерал идоралар билан биргаликда масъул этиб белгиланди.

 

Ҳукумат ҳужжатига кўра:

• 2026 йил 15 майга қадар тажрибани ўтказиш учун зарур бўлган федерал қонун лойиҳалари ишлаб чиқилиб, ҳукуматга тақдим этилади;
• 2026 йил 1 декабргача Ички ишлар вазирлиги мигрантларни мақсадли ёллаш жараёнини таъминлайдиган махсус ахборот тизимини ишга туширади;
• шу муддатга қадар Ички ишлар вазирлиги Рақамли ривожланиш вазирлиги билан ҳамкорликда мигрантлар учун махсус мобил илова ишлаб чиқади;
• 2026 йил 10 декабргача Роструд ва ҳудудий ҳокимликлар мигрантларни ёлловчи иш берувчилар учун меҳнат қонунчилигига риоя этиш бўйича маслаҳат тадбирларини ўтказади (кейинчалик бу тадбирлар ҳар йили давом эттирилади).

 

Тажриба якунлангач, Ички ишлар вазирлиги ва Меҳнат вазирлиги бошқа манфаатдор идоралар билан биргаликда 2030 йил 30 октябргача лойиҳа натижаларини Россия қонунчилигига доимий жорий этиш бўйича таклифлар тайёрлайди.