Россиянинг Ўзбекистонга газ экспорти 30 фоизга ошди
Россия “Сибир кучи” газ қувури орқали Хитойга 39 млрд кубометр, Ўзбекистонга эса 7 млрд кубометрдан ортиқ газ экспорт қилди.
Халқаро энергетика агентлиги (ХEА)нинг газ бозори бўйича ҳисоботига кўра, Россия 2025 йилда қувур орқали табиий газ экспортини ошди. Хусусан, Хитойга етказиб бериладиган газ ҳажми 25 фоизга, Ўзбекистонга эса 30 фоизга кўпайди. Бу ҳақда ТАСС хабар берди.
Ҳисоботда қайд этилишича, Россиянинг Хитойга “Сибир кучи” газ қувури орқали экспорти қарийб 8 миллиард кубометрга ошиб, 2025 йилда 39 миллиард кубометрга етган. Шунингдек, “Марказий Осиё – Марказ” газ қувури тизими орқали Қозоғистон ҳудуди орқали Ўзбекистонга етказиб бериладиган газ ҳажми 30 фоизга кўпайиб, 7 миллиард кубометрдан ошган.
Аввалроқ «Газпром» 2025 йилда биринчи марта Хитойга Европага нисбатан кўпроқ газ етказиб берганини маълум қилган эди. Компания маълумотига кўра, Хитойга 38,8 миллиард кубометр газ экспорт қилинган. Бундан ташқари, Россия Қозоғистон, Ўзбекистон ва Қирғизистонга газ етказиб беришни 22,2 фоизга, Грузияга эса 40,4 фоизга оширган.
Маълумот учун, “Сибир кучи” Россиянинг шарқидаги энг йирик газ транспорт тизими бўлиб, унинг йиллик экспорт қуввати 38 миллиард кубометрни ташкил этади. Ушбу қувур орқали Хитойга газ етказиб бериш 2019 йил декабрь ойида «Газпром» ва CNPC ўртасида 2014 йилда имзоланган 30 йиллик шартнома асосида бошланган. Шартнома доирасида умумий етказиб бериш ҳажми 1 триллион кубометрдан ошиши, қиймати эса қарийб 400 миллиард долларга етиши кутилмоқда.
