“Toshkent metropoliteni” DUK matbuot xizmati xabariga ko‘ra, 16-dekabr kuni soat 16:23 da “Mustaqillik maydoni” bekatidan “Paxtakor” bekati tomon harakatlanishi belgilangan 16-sonli poyezd tarkibida nosozlik yuzaga kelgan.
Yo‘lovchilarni qabul qilish jarayonida, vagon eshiklari yopilayotgan paytda yo‘lovchilardan biri vagonga kirish maqsadida eshikni majburan ochishga uringan. Natijada eshikni himoyalovchi mexanizm ishdan chiqqan.
Mashinist tomonidan nosozlik dastlab bartaraf etilgan bo‘lsa-da, muammo keyingi bekatga yetmasdan yana takrorlangan. Shundan so‘ng, amaldagi yo‘riqnomaga muvofiq, yo‘lovchilar bekatga tushirilgan va harakat tarkibi elektrodepoga olib ketilgan.